العربى على الأنترنت

فى 2001 العالم اتفاجئ بحاجة اسمها Wikipedia ودى عبارة عن موسوعة علمية الكترونية بتعتمد على المحتوى اللى بيحطه المستخدم … فى 2014 ويكيبديا أشهر موسوعة علمية على مستوى العالم فيها ملايين المعلومات لو مكانش المليارات .. ترتيب اللغة العربية بين اللغات : ال 23.
طب ايه المشكلة … تعليم ؟
من بعد 2010 بدأ العالم يتجه لفكرة التعليم الالكترونى .. 2012 شهدت انطلاقة لواحد من أهم مواقع التعليم الالكترونى اللى هوه Coursera وبدأ يقدم كورسات على الانترنت من أقوى الجامعات على مستوى العالم، ومؤخرا بقى بيدى شهادات معتمدة من الجامعات دى بمبالغ رمزية … فى 2014 الموقع نشر احصائية فيها أسماء 60 دولة اللى بيدخل منها طلبة على الموقع ده : طلعت أول دولة عربية فى المركز ال 50 هي المغرب، وتانى دولة عربية هى مصر فى المركز ال 51، اه اسرائيل فى المركز السادس.
طب احنا بنعمل ايه على الانترنت ؟؟ لا علم أكاديمى ولا معلومات امال ايه ؟
– مصر بس فيها 40 مليون مستخدم للأنترنت، منهم 20 مليون مستخدم للفيس بوك منهم 12 مليون تحت سن 30 سنة.
– المعدل الطبيعى للمرور على الفيس بوك فى المرة الواحدة بدون شات 18 دقيقة، ومتوسط الاستخدام اليومى من 2-8 ساعات يوميا.
– Google بتقول انه من 2004 اكثر الكلمات المستخدمة فى مصر على محرك البحث بتاعها : facebook – العاب – فيس – فيسبوك
وانه يوم 1-9 كان ال trend على google البحث عن خبر يخص الممثلة منة جلال.