عندك فيروس سى … كلمة بيقولها كتييرأى ممارس عام فى مصر. فى مسح اجرته وزارة الصحة المصرية فى عاام 2009 اثبت أن 14.7 % ممن أعمارهم بين 15 و 59 سنة مصابون بفيروس سى. [1] فيروس سى القاتل الصامت، الذى يبدأ أثره من ضعف فى وظائف الكبد إلى تليف كامل للكبد أو سرطان الكبد. مشكلة الفيروس ده انه ملهوش امصال مضادة ليه، بالإضافة انه اغلب المصابين بيه مبيكتشفوش ده الا بعد فترة من الاصابة وبيكون ساعتها الكبد فى حالة متأخرة. مصر تعتبر الدول الاكثر اصابة بهذا المرض، سبب انتشاره فى مصر فى الاساس هى حقن التطعيم ضد البلهارسيا واللى كانت بتتنقل من إنسان لإنسان بدون تعقيمها أو تطهيرها بشكل طبى آمن. بعد كده بقى السبب الأساسى هما الحلاقين، وعدم تغيير موس الحلاقة بين زبون والتانى ساهم بشكل كبير فى انتشار المرض بين الناس. حاليا الطامة الكبرى فى انتشار المرض ده هو طبيب الأسنان، اللى بيخالف ضميره الانسانى والمهنى وبيستخدم أدواته مع المرضى كلهم بدون تعقيم كافى، غالبا أدواته بتبقى بؤرة للمرض. منظمة الصحة العالمية نشرت أهم وسائل الوقاية من فيروس سى :
- تجنب الحقن غير الضرورية وغير المأمونة
- تلافي استعمال مشتقات الدم غير المأمونة
- جمع التالف من الأدوات الحادة والتخلص منه
- اجتناب تعاطي المخدرات غير المشروعة والتشارك في معدات الحقن
- الامتناع عن ممارسة الجنس غير الآمن مع مصابين بالالتهاب الكبدي C
- عدم التشارك في اللوازم الشخصية الحادة التي قد تكون ملوثة بدم معد
- تجنب استخدام أدوات ملوثة في رسم الوشوم على الجسم وتثقيبه ووخزه بالإبر.
ربنا يحفظنا ويشفى مرضانا… المراجع : (1) . Mohamoud, Y.A., et al., The epidemiology of hepatitis C virus in Egypt: a systematic review and data synthesis. BMC infectious diseases, 2013. 13(1): p. 288
